Мюнхен анжуманида Украинага БМТ кучларини юбориш бўйича келишувга эришилмади

Германиянинг Мюнхен шаҳрида бўлиб ўтаётган халқаро хавфсизлик анжуманида Украина шарқидаги уруш ҳамда Россиянинг АҚШ сайловларига аралашуви бўйича иддаолар юзасидан Россия билан Ғарб мамлакатлари ўртасидаги яққол зиддият ўртага чиқди.

Нуфузли конференцияда жаҳон давлатларининг етакчи дипломатлари иштирок этмоқда.

17 февраль куни Украина шарқига БМТ тинчликпарвар кучларини юбориш бўйича келишувга эришилмади. Россия ва АҚШ вакиллари эса Вашингтон илгари сураётган янги айбловлар юзасидан истеҳзоли шарҳларни айтишди.

Украина шарқидаги тўқнашувларни тўхтатиш бўйича Германия, Франция, Украина ҳамда Россия иштирок этадиган «Нормандия формати»даги музокаралар эса бекор қилинди. Хабар қилинишича, бунга дипломатларнинг тирбанд кун тартиби сабаб бўлган.

Анжуманнинг иккинчи куни очилиш маросимида сўзлаган Германия ташқи ишлар вазири Зигмар Габриэль Украина шарқига БМТ тинчликпарвар кучларини юбориш Россияга қарши санкцияларни қадамба-қадам енгиллатишга олиб келиши мумкинлигини айтган эди.

Европа Иттифоқи ҳамда АҚШ Россия 2014 йилдан Украинанинг Қрим минтақасини аннексия қилиб олиб, мамлакат шарқидаги айирмачиларни қўллай бошлагани учун Москвага қарши бир неча раунд санкция жорий қилган.

16 февраль куни Мюнхенда бошланган Хавфсизлик бўйича бу йилги халқаро анжуманда Россия президенти Владимир Путин ҳамда АҚШ президенти Дональд Трамп иштирок этмаётир. Уларнинг ўрнига Россиядан Ташқи ишлар вазири Сергей Лавров, АҚШдан эса Мудофаа вазири Жим Мэттис, хавфсизлик бўйича президент маслаҳатчиси Макмастер ҳамда Марказий разведка бошқармаси (МРБ) директори Майк Помпео иштирок этмоқда.

Британия Путин атрофидаги шахсларга санкциялар жорий этди

Британия президент Владимир Путинга яқин бўлган уч миллиардер ва бешта банкка нисбатан санкциялар жорий этди. Бу ҳақда Британия Бош вазири Борис Жонсон парламентда сўзлаган нутқида маълум қилди.

Санкция жорий этилган миллиардерлар – Борис ва Игор Ротенберг ва Генадий Тимченко ўзларини Путиннинг дўстлари сифатида тақдим этишади. Бундан ташқари Промсвязьбанк, "Россия" банки, Индустриал омонат банк, Қора денгиз тараққиёт банки, Генбанк ҳам санкция рўйхатига киритилган.

Жонсон Россия Украинага бостириб кирган тақдирда яна янги санкциялар жорий этилишини билдирди.

Озодлик радиоси рус хизматининг билдиришича, "Россия" банки эгаси Юрий Ковальчук журналистик суриштирув натижасида Путиннинг яқин одамларидан бири экани аниқланган. Мазкур банк таъсисчилари орасида Путиннинг жияни Михаил Шеломов ва Светлана Кривоногих ҳам бор.

Журналистик суриштирувда Кривоногих Путиннинг никоҳсиз туғилган қизининг онаси экани иддао қилинган. Президент Путиннинг ўзи ҳам ойлик иш ҳақини мазкур банк орқали олади.

Промсвязьбанк орқали эса давлат мудофаа буюртмаларига ажратилган пуллар ҳаракати таъминланади. Қолган уч банк Россия босиб олган Қрим ҳудудида фаолият юритади.

Киев Россиядаги ўз элчисини Москвадан чақиртириб олди

Украина Россия ҳукумати ўзларини “ДХР” ва “ЛХР” деб атаб олган айирмачи ҳудудлар мустақиллигини тан олгани ортидан Москвадаги элчиси Василий Покотилони маслаҳатлашув учун Киевга чақиртириб олди.

Аввалроқ Украина Ташқи ишлар вазирлиги президент Владимир Зеленскийга Россия билан дипломатик алоқаларни узишни таклиф қилганди.

Ўз ўрнида Зеленский Россия қўшинлари кенг қамровли равишда мамлакат ичкарисига киритилган тақдирда Украинада ҳарбий ҳолат эълон қилинишини билдирди.

Кремль матбуот котиби Дмитрий Песков Украина ва Россия ўртасида дипломатик алоқалар узилишини “ ўта даражада исталмаган ҳолат” сифатида талқин қилди.

Германия “Шимолий оқим-2” газ қувурини сертификация қилишни тўхтатди

Германия ҳукумати Москва Украинадаги айирмачи ҳудудларни мустақил давлат сифатида тан олгани оқибатида “Шимолий оқим-2” газ қувурини сертификация қилиш тўхтатилганини билдирди.

Dpa агентлигининг хабар беришича, Германия канцлери Олаф Шольц газ қувурини ишга тушириш режаси қайта кўриб чиқилиши шартлигини айтди. Мазкур қувур ишга туширилиши кечиктирилиши ортидан Москва ва Берлин ўртасидаги бошқа ҳамкорлик соҳалари ҳам қайта кўриб чиқилади.

“Шимолий оқим-2” газ қувури Украинани четлаб ўтиб, Болтиқ денгизи орқали Германияга йилига 55 миллиард кубометр газ етказиб бериш мақсадида қурилган эди.

Европа Иттифоқидаги кўплаб давлатлар ва АҚШ “Шимолий оқим-2” газ қувурини Россия ўз сиёсий мақсадлари учун Украина ва ЕИга босим ўтказишда фойдаланади, деб ҳисоблаб келган.Лекин Германия мазкур қувур қурилиши тарафдори бўлган.

“Шимолий оқим-2” Россиянинг “Газпром” ширкати томонидан 2021 йилнинг октябрида қуриб биткизилган ва эндиликда уни фойдаланишга топшириш масаласи кўриб чиқилаётганди.

Россия Давлат думаси “ДХР” ва “ЛХР”ни мустақил давлат сифатида тан олиш қарорини тасдиқлади

Россия Давлат думаси президент Владимир Путин Украинанинг россияпарастлар назорат қилаётган ҳудудини мустақил давлат сифатида тан олиш тўғрисида чиқарган қарорини тасдиқлади.

Дума, шунингдек, “ДХР” ва “ЛХР”билан дўстлик, ҳамкорлик ва ўзаро ёрдам тўғрисидаги шартномаларни ҳам ратификация қилди. Аввалроқ президент Путин ва сепаратчилар лидерлари мазкур шартномаларни имзолаган эди.

Ҳозиргача Россия “ДХР” ва “ЛХР” чегарасини қай тартибда тан олгани аниқ эмас. “ДХР” ва “ЛХР”даги россияпарастлар мазкур вилоятларнинг бир қисминигина назорат қилади. Бу вилоятларнинг асосий ҳудудлари Украина назоратида.

Шартномаларда чегараларнинг аниқ кўрсатилмагани Россияга вилоятларнинг Украина назорат қилаётган қисмига “ДХР” ва “ЛХР” “ҳудудий яҳлитлигини таъминлаш учун ҳужум қилиш”га баҳона яратиб беради.

Дўстлик тўғрисидаги шартномалар асосида Россия “чегарани ҳамкорликда қўриқлаш” учун “ДХР” ва “ЛХР” ҳудудида ҳарбий базалар ташкил этиши мумкин.

“ДХР” ва “ЛХР” тан олиниши ортидан Россия Биржа индекслари тушиб кетди

Россия Биржа индекслари Украинадаги россияпараст сепаратчилар “ДХР” ва “ЛХР” деб номлаб олган ҳудудларни тан олиши ортидан 22 февралда ҳам пасайишда давом этди.

Москва биржаси индекси сессия очилиши пайтида 7 фоиздан кўпроққа, РТС индекси саккиз фоиздан кўпроққа тушиб кетди.

Доллар курси 0,3 фоизга ўсиб, 80 рублдан ошди. Евро қиймати ҳам 1,5 фоизга кўтарилиб, 90 рубль 70 копейкага тенглашди.

22 февраль куни биржа савдолари очилишида Россия давлат облигациялари индекси уч фоизга пастлади ва 2015 йилнинг октябридаги кўрсаткичга тенглашди.

Айни пайтда Brent нефтининг бир баррели нархи ICE биржасида 4 фоизга кўтарилиб, 2014 йилдан бери илк маротаба 97 долларга етди.

Путин “ДХР” ва “ЛХР”га қўшин киритиш тўғрисида буйруқ берди (ВИДЕО)

Россия президенти Владимир Путин Украинанинг Донецк ва Луганскига қўшин киритиш тўғрисида кўрсатма берди, деб хабар қилди Озодлик радиоси рус хизмати.

Душанба куни Путин Украина ҳудудида россияпараст сепаратчилар томонидан босиб олинган ва ўзларини “ДХР” ва “ЛХР” деб атаб олган ҳудудларни мустақил давлат сифатида тан олиш тўғрисидаги фармонни имзолаган эди.

Хабарда таъкидланишича, ҳозирча бу ҳудудларга қўшин киритилгани ёки киритилмагани номаълум. Аммо президент ўз фармонида “ДХР” ва “ЛХР” ҳудудлари хавфсизлигини таъминлашни Россия Қуролли Кучлари зиммасига юклаган.

Озодлик радиоси рус хизмати ижтимоий тармоқларда гўёки Донецкка қараб бораётган зирҳли техника колоннаси тўғрисида видеолар тарқалаётганини ёзди.

22 февраль куни Давлат думаси ва Федерация Кенгаши “ДХР” ва “ЛХР” билан шартномаларни имзолаш тўғрисида қарор қабул қилиши кутилмоқда. Мазкур шартномалар асосида Россия бу сепаратчи ҳудудларга ҳарбий ёрдам кўрсатади.

АҚШнинг БМТдаги доимий вакили: Путин Минск битимларини тилка-пора қилди

Донбассдаги бўлгинчилар назоратида бўлган ҳудудларнинг Россия томонидан мустақил давлат ўлароқ тан олиниши Украина суверенитети ва ҳудудий яхлитлигига путур етказади. “Кенг кўламли можаро юз бериш хавфи ҳақиқатан мавжуд ва уни нима қилиб бўлса ҳам бартараф этиш лозим”, деган БМТ бош котиби ўринбосари Розмари Дикарло Хавфсизлик кенгашининг 22 февралга ўтар кечаси чақирилган фавқулодда йиғилишида.

Йиғилиш бўлгинчи Донецк ва Луганск халқ республикалари мустақиллиги Россия томонидан тан олинганидан сўнг Украина, Франция ва Евроиттифоқ ташаббуси билан чақирилган эди.

АҚШнинг БМТдаги доимий вакили Линда Томас-Гринфилд Путиннинг “ДХР” ва “ЛХР” мустақиллиги тан олинган телемурожаати “уруш учун баҳона ўйлаб топиш”га қаратилганини айтган. Америкалик дипломатга кўра, Путин “Минск битимларини тилка-пора қилган”, Москванинг айни ҳаракатлари эса “Украинага тажовузни давом эттиришга баҳона топиш учун уринишга асос бўлаётганлиги яққол кўриниб турибди”.

АҚШнинг БМТдаги вакили Россия президентининг “ДХР” ва “ЛХР”га қўшин киритишга оид фармони хусусида фикр билдираркан, улар тинчликпарвар кучлар деб аталишини “сафсата” деб атаган. Томас-Гринфилд 22 февраль куни Вашингтон “халқаро ҳуқуқни очиқча бузгани учун Россияни жавобгарликка тортиш” бўйича янги чораларини эълон қилишини қўшимча қилган.

Евроиттифоқ бош дипломати Жозеп Боррель трансатлантик ҳамкорлари билан якдиллигини билдириб, Россиянинг хатти-ҳаракатлари жазосиз қолмаслигини таъкидлаган.

Франция вакили Россия Украинада тинчлик ўрнатишга қаратилган улкан саъй-ҳаракатларни тамомила саботаж қилди, деб ҳисоблашини айтган. Бироқ, унинг фикрича, дипломатия йўли ҳануз очиқ. Аввалроқ Франция президенти Эммануэл Макрон Россиянинг “ДХР” ва “ЛХР”ни тан олишини қоралаб, “аниқ йўналтирилган санкциялар” жорий этишга чақирган.

Хитойнинг доимий вакили барча томонларни босиқлик ва мулоқотга чақирган. Айни пайтда у Россия томонидан “ДХР” ва “ЛХР” тан олинишига расмий Пекиннинг муносабатини, РФ президентининг бу ҳудудларга қўшин киритиш қарорини изоҳламаган.

Россиянинг БМТдаги доимий вакили Василий Небензя Москва ҳамон дипломатик ечимлар учун очиқлигини, бироқ Донбассда “янги хунрезлик бўлишига йўл қўймаслиги”ни урғулаган. У Минск битимлари барбод бўлишининг асосий сабаби Киевнинг “ДХР” ва “ЛХР” билан тўғридан-тўғри мулоқот қилишдан бош тортганида эканини айтган.

Шунингдек, Небензя Россия Минск битимларида томон ҳисобланмаслиги, Москванинг ушбу бўлгинчи республикаларни тан олиши эса ушбу битимлар томонлари таркибини ўзгартирмаслигидан баҳс этган.

Украина вакили Сергей Кислица ўз мамлакатининг музокараларга тайёрлигини билдириб, Россиядан тан олиш ҳақидаги фармонни бекор қилиб, музокаралар столига ўтиришни талаб қилган.

БМТ Хавфсизлик кенгаши йиғилиши бошланишидан олдинроқ Владимир Зеленский фуқароларга мурожаат билан чиқиб, Россиянинг хатти-ҳаракатлари Украинани қўрқита олмагани, мамлакат можарони тинч йўл билан ҳал қилиш аҳдига содиқлигини таъкидлаган. “Бизнинг ҳеч кимдан қарзимиз йўқ, ҳеч кимга ҳеч нарсамизни бериб қўймаймиз”, деган Зеленский.

Туркия Ташқи ишлар вазирлиги Москва томонидан “ДХР” ва “ЛХР”нинг тан олинганини қоралади

Туркия Россиянинг “Донецк Халқ Республикаси” ва “Луганск Халқ Республикаси”ни тан олиш қарорини қабул қилиб бўлмас, деб топиб, уни рад этди.

Туркия Ташқи ишлар вазирлиги баёнотида Россия Федерациясининг мазкур қарори Минск шартномасига зид бўлиши билан бир қаторда Украина суверенитети ва ҳудудий яхлитлигини тан олмаслик маъносини англатиши таъкидланган.

Дипломатлар шу муносабат билан Туркия Украинанинг сиёсий ва ҳудудий яхлитлигига риоя этилишига содиқ эканини урғулаб, манфаатдор томонларнинг барчасини халқаро ҳуқуқ меъёрларига риоя қилишга чақирганлар.

Қозоғистон бош дипломати ўз мамлакати олдида “ДХР” ва “ЛХР”ни тан олиш масаласи турмаганини билдирди

Қозоғистон ташқи ишлар вазири Мухтор Тлеуберди Қозоғистоннинг “ДХР” ва “ЛХР” билан боғлиқ вазият бўйича расмий позицияси ишлаб чиқилаётгани, бироқ мазкур бўлгинчи тузилмаларни тан олиш масаласи мамлакат олдида турмаганини айтди.

Унга кўра, Қозоғистоннинг узил-кесил муносабати “яқин соатларда Хавфсизлик кенгаши йиғилишида” қабул қилинади.

“Ишонтириб айтаманки, олдимизда “ДХР” ва “ЛХР” мустақиллигини тан олиш деган масала тургани йўқ. Биз халқаро ҳуқуққа ҳамда БМТнинг асосий принциплари ва низомларига таянамиз”, деган Тлеуберди.

Кеча Россия президенти Владимир Путин Украина шарқидаги икки бўлгинчи тузилмани мустақил давлатлар сифатида тан олиш ҳақида фармон имзолаган. Озодлик қозоқ хизмати мухбирининг Россия нега бундай қарорга келгани хусусидаги саволига ташқи ишлар вазири муҳтамал сабаблардан бири ўлароқ “Россия билан Ғарб ўртасида хавфсизлик тизими бўйича келишувлар йўқ”лигини кўрсатган.

“Иккинчидан, Норманд формати иштирокчилари Минск битимларини амалга ошириш йўли билан ўзаро тил топишишга муваффақ бўла олишмади. Учинчи сабаб – бу “ДХР” ва “ЛХР”даги гуманитар инқироздир”, деган Мухтор Тлеуберди ўз жавобида.

Дипломатга Донбассга КХШТ кучлари йўлланиш-йўлланмаслигига оид савол ҳам берилган. Қозоғистон ташқи ишлар вазири “ҳарбий ёки тинчликпарвар кучлар фақат КХШТ ҳудудида қўлланиши мумкин”лигини айтган.

“Бунинг учун БМТ Хавфсизлик кенгаши резолюцияси ва мандати зарур, БМТнинг эса ўз тинчликпарвар кучлари мавжуд”, деган Тлеуберди.

Россия президенти Владимир Путин 21 февраль куни Украина шарқидаги сепаратистик республикалар (“ДХР” ва “ЛХР”) Москва томонидан мустақил давлатлар деб тан олинишини билдирган эди. Ғарб мамлакатлари Кремлнинг бу қадамини кескин қораламоқда.

Қозоғистон: Январь воқеалари бўйича ҳибсга олинганларнинг яқинлари Чимкент прокуратурасига келишди

Қозоғистоннинг Чимкент шаҳрида 21 февраль куни бир гуруҳ одам шаҳар прокуратураси биноси ёнига келиб, шаҳар прокурори Габит Муқановни улар ҳузурига чиқишга ва январь воқеалари важидан ҳибсга олинган қариндошларининг айбдорлигига оид далилларни кўрсатишга чақирди. Йиғилганлар маҳбуслардан айбловларни олиб ташлашни ёки жиноят ишларини маъмурий иш билан алмаштиришни талаб қилишди, дея хабар қилди Озодликнинг қозоқ хизмати.

Прокуратурага келган аёллардан бири, Гулзина Нуримбетова ўғли Бахтиёр Шалдибоев ноҳақ қамоққа олинганини айтган. Аёлнинг айтишича, ўғлининг бошига қоп кийдириб ва чаккасига тўппонча тираб, ўзига қарши кўрсатма беришга мажбур қилганлар.

Йиғилганлар жиноят ишлари ҳеч қандай асоссиз қўзғатилганидан ва далиллар ҳануз тақдим этилмаганидан норози. Маҳбуслар орасида митингларда иштирок этмаган тасодифий ўткинчилар ҳам борлиги айтилмоқда.

20 февраль куни Чимкентда Дендропарк ёнида одамлар тўпланишган ва Қозоғистон президенти Қасим-Жомарт Тоқаевни январь воқеалари чоғида ўлдирилган ва қўлга олинганларнинг ишлари адолатли тергов қилинишини таминлашга чақиришган. Улар одамларга кимлар ва қандай шароитда ўқ узганини очиқлашни талаб қилганлар.

Чимкентда оммавий намойишлар 4 январь куни тинч бошланган, 5-6 январь кунлари майдонда ўқ овозлари янграган. 11 январда шаҳар соғлиқни сақлаш бошқармаси ялпи норозилик кунлари шаҳар касалхоналарига 120 дан ортиқ одам ётқизилганини маълум қилган. Кейинроқ улардан 73 нафари ўқотар қуролдан яралангани очиқланган.

Расмий маълумотларга кўра, Қозоғистонда январь ойи бошларида юз берган намойишларда 227 киши ўлган, улардан 19 нафари Чимкент шаҳрида қурбон бўлган.

Январь воқеалари ортидан Чимкентда 87 кишига нисбатан турли моддалар бўйича жиноят ишлари очилган. Улардан 76 нафари суд санкцияси билан қамоққа олинган. Камида 26 кишига озодликдан маҳрум этиш билан боғлиқ бўлмаган эҳтиёт чораси белгиланган. Маҳбусларнинг қариндошлари ноқонуний қўлга олишлар, полициянинг ўзбошимчалиги ва қийноқлардан шикоят қилишмоқда.

Ғарб мамлакатлари Россия томонидан “ДХР” ва “ЛХР”нинг тан олинишини қораламоқда

Россия президенти Владимир Путиннинг кечаги чиқишидан сўнг кўп ўтмай Оқ уй расмий баёнот эълон қилиб, АҚШ Россиянинг бундай қадамини кутганлигини билдирди. Мазкур қарор баёнотда Москва томонидан халқаро мажбуриятларнинг қўпол равишда бузилиши, деб аталган.

АҚШ президенти Жо Байден тез орада Американинг ҳар қандай ширкати ва ташкилотига “ДХР” ва “ЛХР” билан ҳамкорликни тақиқлаш, шунингдек у ерда бизнес юритадиган ҳар қандай шахсларга қарши санкциялар жорий этиш имкониятларини кўриш ҳақида фармон имзолаши кутилмоқда. Баёнотга мувофиқ, бу Россия Украина ҳудудига бостириб кирган тақдирда кучга кирадиган санкциялар туркуми эмас.

Шунингдек, Байденнинг Украина президенти Владимир Зеленский билан телефон орқали сўзлашиши маълум қилинган. Тафсилотлар ҳозирча очиқланган эмас.

НАТО бош котиби Йенс Столтенберг Владимир Путиннинг қарорини кескин қоралаб, у “Украина суверенитети ва ҳудудий яхлитлигига янада катта путур етказишини ва можарони бартараф этишга қаратилган барча саъй-ҳаракатларни чиппакка чиқаришини ва Минск битимларига зид”лигини айтган.

Евроиттифоқ раҳбарлари Шарль Мишель ва Урсула фон дер Ляйен Россия президентининг хатти-ҳаракатини “энг кескин тарзда” қоралаб, янги санкциялар муқаррарлигини эълон қилишган. Улар юз берган воқеаларни халқаро ҳуқуқ ва Украина ҳудудий яхлитлигининг бузилиши, деб аташган.

Германия ТИВ раҳбари Анналена Бербок Путиннинг қарорини “Украинадаги можарони тинч йўл билан ҳал этишга нисбатан жиддий зарба” деб атаган. Польша бош вазири Матеуш Моравецкий эса Кремлга қарши “кескин чора кўриш ва зудлик билан санкциялар жорий этиш”га чақирган. Яқин орада бошқа мамлакатларнинг лидерлари ҳам ўз муносабатини билдириши кутилмоқда.

Айни пайтда Кремлнинг иттифоқчиси бўлмиш Сурия президенти Башар Асад “ДХР” ва “ЛХР” мустақиллигини тан олишга тайёр – бу ҳақда унинг ҳукумати маълум қилган.

Россия президенти Владимир Путин 21 февраль куни Украина шарқидаги сепаратистик республикалар (“ДХР” ва “ЛХР”) Москва томонидан мустақил давлатлар деб тан олинишини билдирган эди.

Зеленский Россия “ДХР” ва “ЛХР”ни тан олиш билан Минск шартномаларидан чиққанини урғулади

Президент Владимир Зеленский 22 февралга ўтар кечаси мамлакат аҳолисига қилган мурожаатида, Россия Федерациясининг хатти-ҳаракатлари ва баёнотларига қарамай, Украинанинг халқаро майдонда тан олинган чегаралари аввалгидек қолаётганини билдирди.

“Биз хотиржам ва ўзимизга ишонган ҳолда турибмиз. Биз ҳамма нарсага тайёрмиз. Лекин оккупация қилинган Донецк ва Луганск вилоятлари мустақиллигини тан олиш Россиянинг Минск шартномаларидан бир томонлама чиқиб кетганини англатади. Бу тинчлик уринишлари ва музокара форматига путур етказади. Бугунги ва эртага қабул қилиниши муҳтамал бўлган қарорлари билан Россия феълан 2014 йилдан бери Донбассда юрган ўз қўшинларини легаллаштирмоқда. Саккиз йилдан бери урушни дастаклаб келаётган мамлакат ўзи иддао қилаётганидек тинчликни қўллаши мумкин эмас”, деган Зеленский.

Украина дипломатик ҳаракатларни давом эттиришга ҳозирлигини урғулаган Зеленский айни пайтда мамлакат чегаралари яхши ҳимоялангани, ҳамкорлар Украинани дастаклаётганини билдирган.

“Украина ўз чегараларини ҳимоя қилиш ҳуқуқига эга. Биз провокация билан душман қўшинлари босқинини бир-биридан яхши ажрата оламиз. Ҳақиқат биз томонда. Биз тинч ва дипломатик йўлга содиқмиз. Биз фақат шу йўлдан юрмоқчимих. Биз ўз еримизда турибмиз. Биз ҳеч кимдан ва ҳеч нимадан қўрқмаймиз”, деган Украина президенти.

Аввалроқ Украина Миллий хавфсизлик ва мудофаа кенгаши раҳбари Алексей Данилов тезкор штаб иши 24/7 тартибига ўтгани ҳақида билдирган. У Украина аввалгидек аннексия қилинган Қрим ва Донбасснинг айирмачилар назорати остида бўлган бўлагини ўз ҳудуди деб тан олишини урғулади.

Россия президенти Владимир Путин 21 февраль кунги телемурожаатида Москва томонидан Украина шарқидаги сепаратистик республикаларни мустақил давлатлар деб тан олинишини билдирган эди. Бу баёнот ортиданоқ телевидение орқали Россия Федерациясининг “Донецк Халқ Республикаси” ва “Луганск Халқ Республикаси” билан дўстлик ва ҳамкорлик шартномасининг имзоланиш маросими намойиш қилинган.

“ДХР” ва “ЛНР” мустақиллигини тан олиш тўғрисидаги фармонларида Путин Россия қўшинларини мазкур ҳудудларга киритишга буйруқ берган.

• Озодлик

ОАВ: АҚШ Россиянинг Украинага оид “даҳшатли” режаси ҳақида БМТни огоҳлантирди

Ғарб ахборот агентликларига кўра, Қўшма Штатлар Бирлашган Миллатлар Ташкилотига Россия томонидан украиналикларни ўлдириш ёки мамлакатга бостириб кирилган тақдирда уларни лагерларга жўнатиш режалари ҳақида "ишончли маълумотлар" борлигини маълум қилган.

АҚШнинг Женевадаги элчиси Нелл Крокер 20 февраль куни БМТнинг инсон ҳуқуқлари бўйича Бош комиссарига йўллаган мактубида АҚШ разведкаси тўплаган “хавотирли маълумотлар” тафсилотларини айтиб ўтган.

Мактуб АFP, Reuters ва Dpa ахборот агентликлари хабар қилди.

“Биз Россиянинг Украинанинг аллақачон босиб олган қисмларида давом этаётган инсон ҳуқуқлари поймол этилиши ҳолатларидан чуқур хавотирдамиз ва бу хавотирлар янги ҳарбий босқиндан сўнг янада кўпайишига ишониш учун барча асосларимиз бор”, — дейилади мактубда.

Крокер мактубда Кремль Россиянинг Украинадаги ҳаракатларига қарши чиққанларни ўлдириш, ўғирлаш, ҳибсга олиш ва қийноққа солишни режалаштираётганини даъво қилган.

Шунингдек, мактубга кўра, Украинада сургунда бўлган рус ва беларуслик қочқинлар, журналистлар ва бошқа фаоллар нишонга олиниши мумкин.

“Россия ўлдириши ёки ҳарбий ишғолдан кейин лагерларга юборилиши керак бўлган украиналикларнинг рўйхатини тузаётганини кўрсатадиган ишончли маълумотларга эгамиз”, дея қайд этилган мактубда.

Крокер, шунингдек, Қўшма Штатлар рус армияси норозилик намойишларини тарқатиб юбориш ёки "аҳолининг тинч қаршилик ҳаракатларини" бостириш учун ҳалокатли усуллардан фойдаланиши мумкинлиги ҳақида маълумотга эга эканлигини қўшимча қилган.

АҚШ юборган мактубида маълумот манбалари ошкор этилмаган.

21 февраль куни бунга жавобан Кремль бу хабарларни “мутлақо ёлғон” деб атади. АҚШ ва бошқа Ғарб расмийлари Россияни Украинага бостириб киришни режалаштираётганликда айбламоқда.

Чегара яқинида 150 мингга яқин аскар тўпланганига қарамай, Москва бундай режаларни рад этиб келади.

Михаил Саакашвили қамоқхонада яна очлик эълон қилди

Грузия собиқ президенти Михаил Саакашвили 21 февраль куни ўзига нисбатан бошланган навбатдаги суд жараёнида яна очлик эълон қилганини билдирди.

“Бугундан бошлаб мен муддатсиз очлик эълон қиламан. Бу режим менга ва халқимизга қилаётган муносабатга жавобдир. Мен Халқ ҳимоячиси ва “Эмпатия” марказлари томонидан ташкил этилган врачлар консилиуми тавсия қилган тиббий кўмак кўрсатилишини талаб қиламан”, -деб иқтибос келтирди Саакашвил сўзларидан "Эхо Кавказа" нашри.

Саакашвили ўз соғлиғи учун қайғурмаслигини айтди ва судда нидерландиялик врачнинг мактубини ўқиб эшиттирди. Мактубда Саакашвилининг қайта очлик эълон қилиши ўлим ҳолати билан якунланиши мумкинлиги қайд этилади.

Саакашвили 2021 йилнинг 1 октябрида Украинадан Грузияга қайтган пайтда қамоққа олинган эди. У ўша куниёқ муддатсиз очлик эълон қилган. 50 кунлик очликдан сўнг аҳволи ёмонлашган Саакашвили 20 ноябрда Гори ҳарбий госпиталига даволаниш учун ётқизилган. Унинг аҳволи бир оз яхшиланиши билан яна қамоқхонага кўчирилган.

CIT: Украина чегарасида Россия ҳарбий техникаси ҳаракати кузатилди

Conflict Intelligence Team (CIT) суриштирув гуруҳи сўнгги кунларда очиқ маълумотларда пайдо бўлган фотосурат ва видеоларга асосланган ҳолда, Россия ҳарбий техникаси Украина ҳудудида ҳаракатлана бошлаганини маълум қилди.

Гуруҳнинг билдиришича, ҳарбийларни Россиянинг бошқа ҳудудларидан Украина чегараларига жамлаш жараёни ниҳоясига етган бўлиши эҳтимол. Чунки авваллари ҳудудга техника темир йўл ёки танк ташувчи юк машиналарида олиб келинган бўлса, эндиликда ҳарбий техника ўзи ҳаракат қила бошлади.

“Техника эҳтимолий ҳужум уюштириладиган асосий позицияларга жойлаштирилаётган бўлиши мумкин”,-дейилади хабарда.

CIT қўлга киритилган маълумотларда чегара яқинидаги рус ҳарбийлари оғир шароитларда яшаётгани, марказлаштирилган озиқ-овқат таъминоти йўқлиги қайд этилганини таъкидлаган.

“Қўшинни узоқ пайт бундай аҳволда ушлаб туриш мумкин эмас. Шунинг учун яқин кунларда ё ҳужум қилинади ёки ҳарбийлар қисман олиб чиқиб кетилади”,-деб ёзади гуруҳ тадқиқотчилари.

АҚШ ва Ғарб давлатлари разведкасининг билдиришича, Россия Украина билан чегарага 150 минг аскар ва ҳарбий техникани жамлаган.