Преподобные Марк и Иона Псково-Печерские

Иона Шестник, Псково-Печерский (+ ок. 1480), основатель Псково-Печерского монастыря, преподобный. Память 29 марта (11 апреля), в Соборах Псковских, Псково-Печерских и Эстонских святых.

Ранее он, нося в миру имя Иоанн, был священником в Георгиевском храме города Юрьева-Ливонского (он же Дерпт, ныне Тарту). Прозван он был Шестником, т.е. пришельцем, потому что родом происходил из московских пределов. Священник Иоанн Шестник был послан из Москвы на служение в Юрьев как миссионер. Он приехал с семьей: женой и двумя сыновьями, в 1467 году.

В Юрьеве он сразу столкнулся с ненавистью и гонениями на православных. Вместе с пресвитером Исидором защищал свою паству от римо-католиков. «Но очень скоро слуги Папы стали принуждать его и его духовных детей к унии». Было много оскорблений. В 1470 году, прожив два года и шесть месяцев, отец Иоанн вынужден был удалиться из Дерпта вместе с женой Марией и детьми под защиту Пскова. Именно тогда, по преданию, одел он под рясу кольчатый панцирь. В Пскове, где «пробыл мало времени», он служил священником в Соборе Живоначальной Троицы.

Вскоре пришла весть из Дерпта о мученической кончине пресвитера Исидора в числе прочих 72 лиц его паствы.

Отец Иоанн очень скорбел о том, что покинул пресвитера Исидора, и решил обречь себя «на страдания пустынной жизни». Когда Иоанн, как говорит предание, «на торгу в воскресный день услышал о старце и пещере при потоке Каменце», то сразу решил поехать туда. Пришедши туда, он начал копать, вместе с матушкой Марией, в горе церковь за «Богом зданною пещерою к западу» . Рано-рано, еще до восхода солнца поднимался отец Иоанн, совершал коленопреклоненную молитву, прося у Господа благословения на великий свой подвиг. «Да будет воля Твоя на земле, как на небе», — повторял он.

От суровой жизни и тяжелых трудов жена отца Иоанна Мария заболела, приняла монашеский постриг, «и наречено бысть имя ей Васса, в том образе и преставися». После того как преставилась ко Господу его сподвижница, при ее похоронах было явлено чудо Божие — ее гроб дважды оказывался извлечен из земли после погребения. Потрясенный чудом, и сам Иоанн постригся с именем Иона, и стал подвизаться еще усерднее, искапывая в горе небольшую церковь.

Летом 1473 года

«Во время же благочестивого князя Ивана Васильевича иеромонах Иона закончил свой труд, — ископа малую церковь в горе и постави келии на столбах, прямо церкви Печерныя». Озаренный радостью, он поспешил во Псков к священникам Троицкой церкви, друзьям, прося освятить храм, но они отказали, говоря что «Церковь в горе эта необычная и необыкновенная по своему устройству». Иона заплакал, и пошел дальше в Новгород. Там, «Припаде к ногам Архиепископа Феофила», он просил у него «дабы повеле освятить храм в горе». Архиепископ дал свое благословение, и те же священники псковские в день Успения Божией Матери, 15 августа 1473 года, освятили храм.

Еще в 1471 году в этом святом месте была явлена икона Успения Божией Матери . Во время освящения церкви эта икона явила чудо: прозрела слепая женщина. Это исцеление воодушевило отца Иону, воодушевило оно и земца Ивана Дементьева, который «даде своего имения удел земли ко храму Пречистый Богородицы и на монастырское ограждение по ручей Каменец, с восточныя и южныя стороны на целое поприще (версты)». Тогда, мало-помалу, начали сюда стекаться на жительство иноки и эта обитель, скрывающаяся прежде в глубине земли, с того времени стала процветать.

По повествованию летописца: «И по сем, священноинок Иона, пожив несколько времени в молитвах и трудах, преставился Богу и погребен бысть в той же пещере». Блаженный Иона почил около 1480 года. Когда его переоблачали, то на теле его нашли кольчатый железный панцирь, «и тело под ним было, как изваяно». Когда отец Иона был воином, то он носил этот панцирь, а когда стал иноком, он стал ему как вериги. Этот панцирь повесили над его гробом, но в одно из нападений врагов он был похищен. Гроб же преподобного Ионы был поставлен в «Богом зданной пещере».

В марте 1642 года мощи преподобного Ионы были переложены в новый гроб, который поместили на старое место.

Подвиги, неустанные труды и ревность к Богу, устроение монастыря и ископание Успенского храма явились основанием того, что Православная Церковь причислила его к лику святых угодников Божиих.

Марк Псково-Печерский (XV в.), преподобный. Память 29 марта, в Соборах Псковских и Псково-Печерских святых

Из первых старцев Псково-Печерской обители по имени известен лишь один Марк. О нем свидетельствуется:

«В начале прежде некий старец живяше на потоце Каменце при пещере, егоже неции ловцы видяху у триех камений, лежащих над церковию Пресвятой Богородицы пещерною; но о сем известно не могохом обрести, каков бяше старец, и коего рода, или како и откуду в сие место прииде, и колико время поживе, и како скончася«. Второй игумен Печерской обители внес имя старца Марка в монастырский синодик. Преподобный игумен Корнилий усомнился в верности этой записи и велел изгладить его имя из синодика. Внезапно он тяжело заболел и получил откровение, что наказан за то, что приказал вычеркнуть имя преподобного Марка из монастырского диптиха. Испросив прощение слезной молитвой у гроба старца Марка, игумен Корнилий восстановил его святое имя. Когда была выкопана пещерная церковь Успения Пресвятой Богородицы и расширены погребальные пещеры, игумен Дорофей нашел гроб преподобного Марка истлевшим, а мощи и одежду невредимыми.

Кондак 1

Избраннии Христови подвижницы, и крепцыи к Богу молитвенницы, во Святей Горе усердно подвизавшиися, и при потоце Каменце Богоматернюю обитель основавшии, преподобнии отцы наши Марко, Ионо, Корнилие и мати Вассо, восхваляем вы любовию смиренно, вы же, яко имущии дерзновенное предстательство ко Господу, поминайте ны, во скорбех и печалех сущих, да зовем вам: Радуйтеся, преподобнии отцы наши, обители Богоматерния преславнии устроителие.

Икос 1

Ангелоподобное житие возлюбившии и суету мира отвергшии, направилися есте в дебри лесныя при потоце Каменце, идеже ко Святей Горе при триех каменех вознесоша своя молитвы к Богу, да дарует Он вечное житие в небесных обителех. Сего ради зовем вам: Радуйтеся, неложнии молитвенницы пред Богом. Радуйтеся, лесныя дебри молитвою облагоухавшии. Радуйтеся, о прощении грехов слезы пролиявшии. Радуйтеся, подвиги вашими струи потока Каменца удивившии. Радуйтеся, и всех верных ими возвеселившии. Радуйтеся, не убоявшиися страха нощнаго. Радуйтеся, в нощи греха и от нас страх изымающии. Радуйтеся, молитвенницы наши пречуднии. Радуйтеся, ходатаи наши предобрии. Радуйтеся, воздух молитвою вашею освятившии. Радуйтеся, сердца наша благоуханием веры напоившии. Радуйтеся, преподобнии отцы наши, обители Богоматерния преславнии устроителие.

Кондак 2

Видя Богоматернюю обитель, яко звезду сияющую и небесным сиянием освещающую путь земнаго жития нашего, прославляем труды и моления ваша, преславнии первоначальницы и старцы, в обители Псково-Печерстей потрудившиися, и Богу вопием: Аллилуиа.

Икос 2

Разумевше козни, от врага спасения нашего диавола содеваемыя, терпение, пощение и Богу молитву противупоставили есте, и тако нищы телом и духом, в дебри лесныя сокрылися, дондеже зверолови пришедшии разгласиша людем о тайне подвигов ваших. Сего ради умиляющеся зовем: Радуйтеся, в терпении и смирении своем Христу Богу подражавшии. Радуйтеся, у триех камней молитвы возносившии. Радуйтеся, греховное окаменение сердец молитвой удаляющии. Радуйтеся, подобно Петру камнем веры ставшии. Радуйтеся, звероловами из таин подвигов ваших изведенныя. Радуйтеся, в сети добродетелей многия уловившии. Радуйтеся, теми и Христа возвеселившии. Радуйтеся, устроителие тихия пристани спасения. Радуйтеся, нашего спасения непрестаннии ходатаи. Радуйтеся, подвиги ваша ангелом ликование. Радуйтеся, житие ваше грешным оплот. Радуйтеся, преподобнии отцы наши, обители Богоматерния преславнии устроителие.

Кондак 3

Силою Божиею к пустынническому житию призванный, пустынножитель старец Марк подвизашеся и сонм подвижников к Святей Горе собраше, и тою силою спасошася, тайною подвигов твоих Богу угождаше, да потрудився тайно, воздаст ти Господь яве, сего ради зовем Ему: Аллилуиа.

Икос 3

Имея помысл чист и душу непорочну, блаженный отче Марко, уразумел еси суетность мира сего и непостоянство, и вечных благ вожделев, отреклся еси от мира и иноческое житие восприим. Сего ради и восхваляем тя, славяще еже о тебе изволение Божие: Радуйся, яко земное отринув, умом твоим в небесное воспарил еси. Радуйся, путь твой в небо подвигом украсил еси. Радуйся, смирения теплый стяжателю. Радуйся, молитвы кадило благоприятное. Радуйся, слез покаянных неоскудный источниче. Радуйся, благое иго Христово на себе возложивый. Радуйся, всего себе Богу предавый. Радуйся, красоту селения Божия возлюбивый. Радуйся, приметатися в Дому Божием изволивый. Радуйся, яко странник и пришлец быв на земли. Радуйся, и нас не оставляяй твоею помощию. Радуйтеся, преподобнии отцы наши, обители Богоматерния преславнии устроителие.

Кондак 4

Бурею искушений и бед веры ради православныя и жития чистаго от латинян претерпевый и единаго точию на потребу ища, еже како Богу угодити, покинул еси град Дерпт1, идеже ты пастырствовал еси, блаженне Ионо, и достигл еси Псковския страны, при потоце Каменце обитель Богородицы учредив, в нейже с лики иночествующих немолчно вопиял еси Богу: Аллилуиа.

Икос 4

Слышавше хритоименитии людие града Пскова и веси, яко основание обители иноческия положил еси, преподобне Ионо, возрадовашася радостию велию, и яко ангела Божия тя почитаху, служаще от имений своих к устроению оныя обители и вопияху тебе сице: Радуйся, веления Божия послушателю. Радуйся, пастырю добрый Христова стада. Радуйся, злобою латинян за веру искушенный. Радуйся, со скорбию паству свою Дерптскую покинувый. Радуйся, славный сподвижниче блаженнаго пресвитера Исидора. Радуйся, в страну Псковскую стопы своя направивый. Радуйся, о пещерах Богом зданных от изборян услышавый. Радуйся, Богоматерию возлюбленный и призванный. Радуйся, в горе церковь Успения ископавый. Радуйся, две келлии на столбех противу церкве устроивый. Радуйся, устроителю богомудрый. Радуйтеся, преподобнии отцы наши, обители Богоматерния преславнии устроителие.

Кондак 5

Богоприятная жизнь источается от тебе о преподобне Ионо! Тую бо обретше, яко некое сокровище, супружница твоя и чада, и яко бисер многоценный слагающе в себе, на высоту добродетелей восшедше, восхвалиша Бога песнию: Аллилуиа.

Икос 5

Видящи преславное житие и терпение мужа своего, не устрашилася еси трудов и подвигов, преподобная мати Вассо, и подражающе житию его, поселилася близ обители основанныя у потока Каменца, и тамо пострижение иноческое и болезни тела прияла еси, сочетавшися Христу. Сего ради восхваляем тя похвалами сими: Радуйся, преславная сподвижнице супруга твоего. Радуйся, последовавшая за ним к пещере, Богом зданней. Радуйся, первая постриженнице Богородичной обители. Радуйся, чада твоя благочестию научившая. Радуйся, скорби пастырския и гонения от латинян в Дерпте с супругом твоим разделившая. Радуйся, в волнении духа веры не угасившая. Радуйся, пожелавшая со Христом сочетатися. Радуйся, Богоматернюю обитель возлюбившая. Радуйся, погребение прияти в ней возжелавшая. Радуйся, первая чудотворице обители при Каменце. Радуйся, молитвами твоими в болезнех помогаеши. Радуйтеся, преподобнии отцы наши, обители Богоматерния преславнии устроителие.

Кондак 6

Проповедуя слово Божие, преподобне отче Корнилие, в стране Чудстей, многия неверныя ко Христу привел еси. Ревностию Божиею распалаем, храмы многи для Чуди построил еси и пресвитеры им даровав, указал еси им путь ко спасению, поя Богу: Аллилуиа.

Икос 6

Возсиял еси, яко звезда богосветлая во обители Псково-Печерстей и стране Чудстей, преподобне блаженне Корнилие! От юности бо Христа возлюбив, и еще млад леты, но тверд разумом, поставлен был еси игумен обители сея, идеже четыредесять и осьмь лет пастырствовал еси, храмы благолепны устрояя и обитель вельми украшая, сего ради зовем ти: Радуйся, юность свою Господеви предавый. Радуйся, совершенство духовное во обители получивый. Радуйся, игуменом от братии достойно избранный. Радуйся, жизнь святую и постническую проводивый. Радуйся, ревности ко благу обители и славе имени Христова неусыпный носителю бывый. Радуйся, твердостию во искушении и непреклонностию в терпении даже до смерти обогативыйся. Радуйся, многими храмы обитель украсивый. Радуйся, крепки стены каменны воздвигий. Радуйся, и нам непрестанно помогаяй воздвигати храм своея души. Радуйся, ограждаяй нас, яко стеною от греха и соблазна. Радуйся, великий о иноцех попечителю. Радуйтеся, преподобнии отцы наши, обители Богоматерния преславнии устроителие.

Кондак 7

Хотя пречестный игумен Дорофей зрети тайну пещеры погребальныя, увиде, яко гроб, идеже лежаше мощи преподобнаго первоначальника Марка, истле и разсыпася, но глава и кости невреждены бывша и токмо обвиты, яко власяницею, корением древесным, в радости восклицаше Богу: Аллилуиа.

Икос 7

Дивно и непостижимо есть! Древо гроба тлению предадеся, кости же и глава, и куколь, и одежды преподобнаго старца Марка сохранишася: нетление бо силу Божию проповедаша и праведность жития подтвердиша. Сего ради и мы, суще во умилении, глаголем: Радуйся, преподобне Марко, великий наш подвижниче. Радуйся, нетлением костей твоих возсиявый. Радуйся, и риз твоих бренных нетления удостоивыйся. Радуйся, грехов тления молитвами твоими в нас устраняяй. Радуйся, почитати тя нас наставляяй. Радуйся, благословением архиереа Псковскаго Иннокентиа по временех в новы ризы облеченный. Радуйся, такожде в нове гробе положенный. Радуйся, добродетельное благоухание иночествующих. Радуйся, и доныне к обители любовию пламенея охраняеши ю. Радуйся, всяк бо приходящий к тебе с верою исцеления дары приемлет. Радуйся, неисцельныя язвы молитвою твоею исцеляющий. Радуйтеся, преподобнии отцы наши, обители Богоматерния преславнии устроителие.

Кондак 8

Странствие земное скончавшу ти, Ионо приснопамятне, иноцы обители уготовляху тя к погребению и на теле твоем обретоша тайно носимыя тобою вериги: водрузиша их на стене противу гроба твоего, да видевшии их узрят и подвизи твоя, спсения ради восприятыя на ся, и благодарне Богу воззовут: Аллилуиа.

Икос 8

Вся братия обители твоея, преблаженне Ионо, со священным собором, и люди, со слезами и пении надгробными изнесоша, всечестне, тело твое ко гробу и погребоша тя в пещере, Богом зданней, близ храма Пресвятыя Богородицы Успения, тобою в горе ископанному, и ходатайствы и труды твоими освященному от Псковских пресвитер Живоначальныя Троицы. Мы же у раки с останками твоими честными, вопием ти таковая: Радуйся, во благоухании святыни сном смертным опочивый. Радуйся, смерть вкусивый, тления же не познавый. Радуйся, в ризу нетления благодатию Божиею облеченный. Радуйся, честная рака твоя бысть врачебница всем болящым. Радуйся, яко всяк с верою к тебе приходяяй утешение получает. Радуйся, разслабленных духом крепосте и твердыне. Радуйся, христианския семьи молитвой охраняяй. Радуйся, иночествующым помощниче скорый. Радуйся, купно с Марком труды обители восприявый на ся. Радуйся, купно с ним же в пещере почиваяй. Радуйся, твоим духом и нас не оставляяй. Радуйтеся, преподобнии отцы наши, обители Богоматерния преславнии устроителие.

Кондак 9

Ангели небеснии радостно прияша чистую душу твою, преподобная мати Вассо! И вознесоша ю во обители небесныя, идеже Царь Славы Христос Господь, венча тя венцем праведничим, егоже уготова всем возлюбльшым Его, и дарова нам тебе, заступницу и молитвенницу благую, да благодарне вопием Ему: Аллилуиа.

Икос 9

Витии многовещаннии не возмогут по достоянию воспети славу от Господа уготованную святым Его во Царствии Небеснем, еяже наследница сподобилася еси быти, преподобная мати Вассо! Сея славы сопричастницы и нас сподоби быти святыми твоими молитвами, да воспоем ти радостно: Радуйся, ликующи в чертозе Небеснаго Домовладыки. Радуйся, с небесных высот и к нам милостивно приникающи. Радуйся, иночествующым обители молитвою помогающи. Радуйся, в сониих и видениих верным являющися. Радуйся, кощунную руку дерзостно коснувшуюся раки мощей твоих отмстившая скоро. Радуйся, огнем от гроба изшедшим, того устрашившая. Радуйся, в огне добродетелей нас очищающая. Радуйся, отцем и матерем нашым в старости сило. Радуйся, чадом нашым благодатная помоще. Радуйся, всем притекающым к тебе скорое услышание. Радуйтеся, преподобнии отцы наши, обители Богоматерния преславнии устроителие.

Кондак 10

Спасти хотя иночествующих от мира, обитель твою оградою каменною с башнями и враты железными обнесл еси, преподобне отче Корнилие, чрез ограду от греха, врата в Царствие Небесное открыл еси, идеже со ангелы ныне ликуеши и песнопоеши Бога, песнию: Аллилуиа.

Икос 10

Царю Небесному себе уготовивый еще на земли, смерть от руки царя земнаго мужественне приял еси, быв предпослан им от жития земнаго в Царствие Небесное. Сего ради удивляющеся твоим страданием за правду, и мужественней кончине, со слезами зовем: Радуйся, священномучениче преславный. Радуйся, клеветы ради невинно погубленный. Радуйся, молитвою твоею от клеветы нас защищаеши. Радуйся, попечением твоим от злых недругов нас охраняеши. Радуйся, обитель твою присно зряй с небесных селений. Радуйся, защищаяй ю непрестанно от бед и напастей. Радуйся, честною кровию твоею путь от врат обители до храма Богородичнаго Успения освятивый. Радуйся, грознаго царя к покаянию обративый. Радуйся, многими дары от него почтенный. Радуйся, благодатных даров церковных и нас сподобляеши. Радуйтеся, преподобнии отцы наши, обители Богоматерния преславнии устроителие.

Кондак 11

Пение всеумиленное приносим вам, преподобнии отцы наши: Марко, Ионо, преподобномучениче Корнилие и преподобная мати Вассо! Пред ракою мощей и святым образом вашим предстояще и молящеся прилежно: яко сподобилися есте небесных обителей, тако и нас доведите вашими молитвами Царствия Небеснаго, да воспоем Богу: Аллилуиа.

Икос 11

Светоприимны светильники вас вемы, Престолу Божию предстоящя, и мрак страстей и грехов наших, лучами молитв разгоняющя. Озарите убо от горних высот и наша сердца, да достойно вопием вам сице: Радуйтеся, Света Троическаго зрителие. Радуйтеся, мира горняго блаженнии обитателие. Радуйтеся, земныя обители звезды небесныя. Радуйся, Марко, блаженный старче и первоначальниче. Радуйся, Ионо, первый обители устроителю. Радуйся, и доныне храм тобою ископанный красуется. Радуйся, Корнилие блаженный, игумен обители сея и славный преподобномучениче. Радуйся, даже до смерти и мучения возлюбивый обитель свою. Радуйся, и ныне посещаеши ю твоим духом праведным. Радуйся, Вассо, достойная сподвижнице супруга твоего и по смерти. Радуйся, при погребении твоем гроб твой с останками в земли оставити не восхотевшая, но на поверхность земли их дважды возносившая. Радуйся, теми указавшая оставити мощи твоя на поверхности земли, в пещере Богом зданней. Радуйтеся, преподобнии отцы наши, обители Богоматерния преславнии устроителие.

Кондак 12

Благодать и милость испросите нам у Бога, преподобнии, молитвами вашими, да утвердившеся в заповедех Его, получим спасение вечное, и присно величающе вы хвалами благодарными, воспоим Богу: Аллилуиа.

Икос 12

Поюще подвиги предивнаго жития вашего и славяще чудеса, ублажаем вас, преподобнии, яко многомощных молитвенников о нас пред Господем. Вы же принесите моление теплое о нас ко Владыце, да сподобит нас Небеснаго Царствия Своего, вопиющих вам с любовию таковая: Радуйтеся, благодатию Пресвятаго Духа приосененнии. Радуйтеся, Пресвятыя Троицы служителие вернии. Радуйтеся, ангелом собеседницы предивнии. Радуйтеся, воспевающии вкупе со Архангелы и Ангелы Бога. Радуйся, Марко, жития нашего наставниче. Радуйся, Ионо, пастырю преискренний. Радуйся, Корнилие, блаженный на небеси ходатаю. Радуйся, Вассо, училище благочестия, добродетельми сияющее. Радуйтеся, преславнии отцы наши, в обители Псково-Печерстей просиявшии. Радуйтеся, немеркнущим светом душы наша озаряющии. Радуйтеся, преподобнии отцы наши, обители Богоматерния преславнии устроителие.

Кондак 13

О преподобнии угодницы и преславнии чудотворцы: Корнилие, Марко, Ионо и Вассо! Милостивно приимите от нас сие малое моление наше, в похвалу вам возносимое, и предстояще Престолу Царя Славы, умолите Его, да сохранит нас от враг видимых и невидимых, от смертоносных ран, и недугов, от всяческия скорби и печали житейския, и вечнаго мучения избавит ны, вопиющих Ему усердно: Аллилуиа.

Этот кондак читается трижды, затем икос 1-й и кондак 1-й

Молитва собору святых преподобных Псково-Печерских

О преподобнии отцы наши и велиции чудотворцы: Корнилие, Марко, Ионо и мати Вассо! Смиренно припадающе к вам и коленопреклонше молящеся пред ракою мощей и пречистым образом вашым, просим: не отвратите лица вашего от молящихся с сердцем сокрушенным и смиренным: умолите Господа сил, да сохранит мирну страну нашу, обитель же сию да укрепит, и всем подвизающымся в ней дарует спасение вечное. Помозите нам, угодницы Божии, создати храм благолепен в сердцах наших и украсити сей храм добродетельми, да жительствует в нем Господь! Оградите нас стеною молитв ваших от греховных стрел и искушений, да богоугодне зде на земли поживем и Вечное Царство унаследим, хваляще Отца, и Сына, и Святаго Духа, ныне и в безконечныя веки. Аминь.

Тропарь преподобным Марку, Ионе, Корнилию и Вассе Псково-Печерским

Тропарь

Пустынническаго жития начальницы, обители Богоматерния устроителие, преподобнии отцы Марко, Ионо и Корнилие, и сподвижница славная Вассо, во святей горе у потока Каменца подвизавшиеся, и тамо во глубинах недр земли храм ископавшии; последиже иноки ту собравшеся, добродетельми сияюще, обитель украшаху. Ныне же в Небеснех Чертозех ликуете, молящеся ко Господу прилежно, во еже спастися нам.

Ин тропарь

Яко светильницы, явистеся всесветлии в вертепе Царицы Богоматери, преподобнии отцы наши Марко, Ионо и Корнилие, вы бо, крест Христов на рамо вземше, усердно Тому последовасте и, чистотою Богови приближившеся, отонудуже силами чудес обогатистеся. Тем и мы любезно прибегаем к вам и умильно глаголем: о преподобнии, молите Христа Бога спастися душам нашим.

Кондак

Днесь вернии ликовствуют, память преподобных Псково-Печерских совершающе. Днесь бо в чертозех Царя славы молятся, поминающе наши немощи и печали, непрестанно просят даровать нам мир и велию милость.

Ин кондак

Христовою любовию уязвившеся, преподобнии, и Того крест на рамо вземше, понесли есте Божественне, вооружившеся на невидимыя враги и непрестанныя молитвы, яко копие, в руках имуще крепко, победили есте бесовская ополчения, тем зовем вам: радуйтеся, преподобнии отцы наши Марко, Ионо и Корнилие, верных удобрение.

Величание

Ублажаем вас, преподобнии отцы Марко, Ионо и Корнилие, со Вассою славною, и чтим святую память вашу, наставницы монахов и собеседницы ангелов.

Тропарь Марка, Ионы и Корнилия Псково-Печерских

Яко светильницы, явистеся всесветлии/ в вертепе Царицы Богоматери,/ преподобнии отцы наши Марко, Ионо и Корнилие,/ вы бо, крест Христов на рамо вземше,/ усердно тому последовасте/ и, чистотою Богови приближившеся,/ отонудуже силами чудес обогатистеся,/ тем и мы любезно прибегаем к вам и умильно глаголем:/ о преподобнии, молите Христа Бога/ спастися душам нашим.

Кондак Марка, Ионы и Корнилия Псково-Печерских

Христовою любовию уязвившеся, преподобнии,/ и Того крест на рамо вземше,/ понесли есте Божественне, вооружившеся на невидимыя враги/ и непрестанный молитвы, яко копие, в руках имуще крепко,/ победили есте бесовския ополчения,/ тем зовем вам:/ радуйтеся, преподобнии отцы наши Марко, Ионо и Корнилие,/ верных удобрение.